دبئی: بیوٹی ورلڈ مڈل ایسٹ 2026ء کی نمائش میں پاکستان پویلین کا افتتاح

دبئی میں پاکستان کے قونصل جنرل حسین محمد نے دبئی ورلڈ ٹریڈ سینٹر میں منعقدہ ’بیوٹی ورلڈ مڈل ایسٹ 2026ء‘ کی 30ویں بین الاقوامی نمائش کے موقع پر “پاکستان پویلین” کا باضابطہ افتتاح کر دیا ہے۔ 6 سے 8 اکتوبر تک جاری رہنے والی اس عالمی نمائش میں دنیا بھر سے پرسنل کیئر، کاسمیٹکس، اسکن کیئر، ہیئر کیئر، پرفیومری اور بیوٹی ٹیکنالوجی کے شعبوں سے وابستہ ادارے شرکت کر رہے ہیں۔ افتتاحی تقریب کے موقع پر ٹریڈ اینڈ انویسٹمنٹ قونصلر علی زیب خان اور قونصلر محمد ہارون چوہدری بھی قونصل جنرل کے ہمراہ موجود تھے۔

پاکستان پویلین میں ٹریڈ ڈویلپمنٹ اتھارٹی آف پاکستان (TDAP) کے زیرِ اہتمام 4 ممتاز پاکستانی کمپنیاں شرکت کر رہی ہیں، جو اپنی اعلیٰ معیاری مصنوعات، صنعتی صلاحیت اور برآمدی استعداد کو عالمی خریداروں کے سامنے پیش کر رہی ہیں۔ قونصل جنرل حسین محمد اور ٹریڈ اینڈ انویسٹمنٹ قونصلر علی زیب خان نے کہا کہ متحدہ عرب امارات (UAE) پاکستانی برآمد کنندگان کے لیے ایک کلیدی تجارتی مرکز اور مشرقِ وسطیٰ کی وسیع مارکیٹ تک رسائی کا اہم ترین ذریعہ ہے۔ 70 سے زائد ممالک کے 1,400 سے زائد نمائش کنندگان کی موجودگی میں یہ نمائش پاکستانی بیوٹی انڈسٹری کو عالمی سطح پر اجاگر کرنے کا بہترین پلیٹ فارم ثابت ہو رہی ہے۔