امریکا: دوسری عالمی جنگ کے بعد پہلی بار فائرنگ کے ذریعے سزائے موت کا اعلان

امریکی محکمۂ دفاع (پینٹاگون) نے سال 2009ء میں فورٹ ہُڈ ملٹری بیس پر فائرنگ کے ہولناک واقعے میں ملوث سابق امریکی فوجی میجر اور معالج ندال ملک حسن کو فائرنگ اسکواد کے ذریعے سزائے موت دینے کا اعلان کیا ہے۔ پینٹاگون کے ترجمان شان پارنیل کے مطابق وزیرِ دفاع پیٹ ہیگستھ کی جانب سے ندال حسن کی سزائے موت کی عمل داری کی سفارش کی گئی تھی، جسے امریکی صدر ڈونلڈ ٹرمپ نے باضابطہ منظوری دے دی ہے۔ دوسری عالمی جنگ کے خاتمے کے بعد امریکی تاریخ میں یہ پہلا موقع ہوگا کہ کسی ملٹری قیدی کو فائرنگ اسکواد کے ذریعے سزائے موت دی جائے گی۔

ندال ملک حسن کو 13 غیر مسلح امریکی اہلکاروں کے قتلِ عمد اور 32 افراد کو شدید زخمی کرنے کے جرم میں فوجی افسران پر مشتمل 13 رکنی جیوری نے متفقہ طور پر سزائے موت سنائی تھی۔ امریکی ملٹری قانون کے مطابق کسی بھی فوجی کی سزائے موت پر عمل در آمد کے لیے ملک کے صدر کی حتمی منظوری لازمی ہوتی ہے۔ پینٹاگون کے ترجمان کا مزید کہنا تھا کہ سزائے موت کے وقت اور مقام کا تعین امریکی فوج کے سیکرٹری کی جانب سے کیا جائے گا۔