آزاد جموں و کشمیر کابینہ میں تین وزراء کے محکموں میں ردوبدل

آزاد جموں و کشمیر حکومت کی جانب سے کابینہ کے تین وزراء کے محکموں میں ردوبدل کر دیا گیا ہے، جس کا باقاعدہ نوٹیفکیشن محکمہ سروسز اینڈ جنرل ایڈمنسٹریشن کی طرف سے جاری کر دیا گیا ہے۔ جاری کردہ نوٹیفکیشن کے مطابق وزیر صحت و بہبود آبادی ڈاکٹر مصطفیٰ بشیر سے بورڈ آف ریونیو کا قلمدان واپس لے کر راجہ محمد ریاست کو تفویض کر دیا گیا ہے۔ اس کے علاوہ عبدالرحمان آرائیں کو سیاحت کے ساتھ ساتھ سپورٹس، یوتھ اینڈ کلچر، صنعت و کامرس، لیبر و اوزان و پیمائش، معدنی وسائل اور پرنٹنگ پریس کے اہم محکمے بھی سونپ دیے گئے ہیں۔ محکموں کی اس نئی تقسیم کا اطلاق فوری طور پر کر دیا گیا ہے۔