امریکی صدر ڈونلڈ ٹرمپ کی عوامی مقبولیت مسلسل ریکارڈ کم سطح پر برقرار

روئٹرز اور اپسوس (Reuters/Ipsos) کے نئے جائزے کے مطابق امریکی صدر ڈونلڈ ٹرمپ کی عوامی مقبولیت مسلسل کم ترین سطح پر برقرار ہے۔ سروے کے مطابق صرف 32 فیصد امریکیوں نے بطور صدر ان کی کارکردگی کی توثیق کی، جو ان کے سیاسی کیریئر کا کم ترین گراف ہے۔ اس گرتی ہوئی مقبولیت کی بنیادی وجہ ملک میں بڑھتی ہوئی مہنگائی، معاشی خدشات اور ایران کے خلاف جنگ جیسے فیصلوں پر عوامی غیر اطمینان قرار دی جا رہی ہے۔

سب سے نمایاں تبدیلی ہسپانوی (ہسپانک) ووٹرز کے رویے میں دیکھنے میں آئی ہے، جہاں ٹرمپ کی حمایت مزید گھٹ کر محض 24 فیصد رہ گئی ہے، جو ان کے دونوں ادوارِ صدارت کے دوران ہسپانوی ووٹرز میں مقبولیت کی کم ترین شرح ہے۔ آئندہ مڈ ٹرم (وسط مدتی) انتخابات کے حوالے سے صرف 26 فیصد رجسٹرڈ ہسپانوی ووٹرز ریپبلکن پارٹی کو ووٹ دینے کے خواش مند ہیں، جبکہ 52 فیصد ووٹرز ڈیموکریٹس کے ساتھ کھڑے ہیں۔ 2024ء کے صدارتی انتخابات میں ٹرمپ کی فتح میں اہم ترین کردار ادا کرنے والے اس بڑے ووٹ بینک کا یوں دور ہونا ریپبلکن پارٹی کے لیے ایک بڑا سیاسی دھچکا تصور کیا جا رہا ہے۔