وزیرِ خزانہ محمد اورنگزیب کا آڈیٹر جنرل ہیڈکوارٹرز کا دورہ،سینٹر فار گورنمنٹ ڈیٹا اینالیٹکس کا افتتاح

اسلام آباد: وفاقی وزیرِ خزانہ سینیٹر محمد اورنگزیب نے آڈیٹر جنرل پاکستان کے ہیڈکوارٹرز کا دورہ کیا جہاں انہوں نے سینٹر فار گورنمنٹ ڈیٹا اینالیٹکس کا افتتاح کیا۔ اس موقع پر وزیرِ خزانہ نے کہا کہ یہ اقدام شفافیت، بہتر حکمرانی اور ڈیجیٹل تبدیلی کی جانب ایک اہم پیش رفت ہے۔

اعلامیے کے مطابق آڈیٹر جنرل پاکستان مقبول احمد گوندل نے آڈٹ کے عمل میں مقدار کے بجائے معیار پر زور دیا اور کہا کہ جدید ڈیٹا اینالیٹکس کے ذریعے ادارہ جاتی اور منصوبہ جاتی آڈٹ رپورٹنگ کو مزید مؤثر بنایا جائے گا۔کنٹرولر جنرل آف اکاؤنٹس عمر علی خان نے وزیرِ خزانہ کو مالیاتی اصلاحات پر بریفنگ دی، جس میں کیش لیس اور ڈیجیٹل ادائیگیوں، راست سسٹم اور آن لائن بلنگ میں ہونے والی پیش رفت سے آگاہ کیا گیا۔دورے کے اختتام پر وفاقی وزیرِ خزانہ محمد اورنگزیب نے آڈیٹر جنرل آفس کے احاطے میں پودا بھی لگایا، جسے ماحولیاتی بہتری کے لیے ایک علامتی اقدام قرار دیا گیا۔