ایران سے براہِ راست مذاکرات کیلئے تیار ہیں : صدر ٹرمپ کا اعلان

امریکی صدر ڈونلڈ ٹرمپ نے وائٹ ہاؤس میں صحافیوں سے گفتگو کرتے ہوئے کہا ہے کہ وہ ایران کے ساتھ براہِ راست مذاکرات کے لیے ہمیشہ تیار ہیں۔ تاہم، انہوں نے اماراتی طیارے سے پیش آنے والے حالیہ واقعے کا ذمہ دار ایران ہی کو قرار دیا۔ برطانیہ کے آر اے ایف فیئر فورڈ (RAF Fairford) ایئربیس سے امریکی بمبار طیاروں کے اچانک انخلا پر بات کرتے ہوئے صدر ٹرمپ نے تصدیق کی کہ ایک مخصوص اور بڑا خطرہ موجود تھا جس کی وجہ سے بمبار طیاروں کو حفاظت کے پیشِ نظر واپس بلانا پڑا۔

سوشل میڈیا پلیٹ فارم ‘ٹروتھ سوشل’ پر اپنی پوسٹ اور میڈیا سے گفتگو میں صدر ٹرمپ نے ایندھن کی بڑھتی ہوئی عالمی قیمتوں پر بھی وضاحت کی۔ انہوں نے کہا کہ پٹرولیم مصنوعات کی قیمتوں میں اضافے کا تعلق اب ایران کے خلاف جنگ یا آبنائے ہرمز کی صورتحال سے نہیں رہا، بلکہ اس کی اصل وجہ ریفائنریز کا بحران ہے۔ انہوں نے روس یوکرین جنگ اور اپنے سیاسی مخالفین کو اس کا ذمہ دار ٹھہراتے ہوئے کہا کہ یوکرینی حملوں کی وجہ سے روسی ریفائنریز متاثر ہو رہی ہیں، جبکہ امریکا میں کیلیفورنیا جیسی ڈیموکریٹک ریاستوں میں ریفائنریوں کو بند کیا جا رہا ہے۔