میر رضا کیس: جوڈیشل کمیشن کا جائے وقوعہ کے دورے کا فیصلہ

نوجوان تاجر میر رضا کی موت کی تحقیقات کے لیے قائم جوڈیشل کمیشن نے تفتیشی افسر کا بیان قلمبند کرنے سے قبل خود جائے وقوعہ کا دورہ کرنے کا فیصلہ کیا ہے۔ کمیشن نے فوکل پرسن سندھ حکومت کو تمام تر انتظامات کرنے کی ہدایت کر دی ہے، جبکہ تفتیشی افسر ڈی ایس پی سراج لاشاری اور میر رضا کے اہل خانہ کو بھی جائے وقوعہ پر پہنچنے کی ہدایت کی گئی ہے۔ کمیشن کے مطابق اس دورے سے رپورٹ کی سفارشات مرتب کرنے میں مدد ملے گی۔ اس کے علاوہ ڈی ایس پی سراج لاشاری اور سی پی ایل سی کے نمائندے کاشف کا بیان 7 اکتوبر کو ریکارڈ کیا جائے گا، جبکہ مشکوک گاڑیوں سے متعلق تحقیقاتی صحافیوں سے 6 اکتوبر کو بریفنگ طلب کی گئی ہے۔