پاکستان کے شمالی اور شمال مغربی علاقوں میں زلزلے کے جھٹکے

پاکستان کے شمالی اور شمال مغربی علاقوں میں زلزلے کے شدید جھٹکے محسوس کیے گئے ہیں، جس سے شہریوں میں خوف و ہراس پھیل گیا۔ زلزلہ پیما مرکز اور امریکی جیولوجیکل سروے (USGS) کے مطابق زلزلے کی شدت ریکٹر اسکیل پر 4.9 ریکارڈ کی گئی۔ زلزلے کے جھٹکے سوات، بونیر، چترال، آزاد کشمیر اور ان کے گرد و نواح کی وادیوں میں واضح طور پر محسوس کیے گئے، جہاں لوگ کلمہ طیبہ کا ورد کرتے ہوئے گھروں اور دفاتر سے باہر نکل آئے۔

امریکی جیولوجیکل سروے کے مطابق زلزلے کا مرکز پاکستان، افغانستان اور تاجکستان کا سرحدی علاقہ تھا، جبکہ اس کی گہرائی 220 کلومیٹر زیرِ زمین ریکارڈ کی گئی۔ زیرِ زمین گہرائی زیادہ ہونے کی وجہ سے علاقے میں کسی بڑے جانی یا مالی نقصان کی فوری طور پر کوئی اطلاع موصول نہیں ہوئی ہے اور صورتِ حال کا جائزہ لیا جا رہا ہے۔