سعودی عرب میں میزائل اور ڈرون روکنے کی ویڈیوز بنانے پر پابندی عائد

سعودی وزارت داخلہ نے مملکت میں مقیم شہریوں اور غیر ملکیوں (تارکین وطن) کے لیے ایک اہم سیکیورٹی انتباہ جاری کرتے ہوئے میزائلوں، ڈرونز یا فضائی دفاعی نظام کی جانب سے دشمن کی کارروائیوں کو فضا میں ناکارہ بنانے کے مناظر کی ویڈیوز، تصاویر بنانے اور انہیں سوشل میڈیا پر پوسٹ یا شیئر کرنے پر مکمل پابندی عائد کر دی ہے۔

وزارت داخلہ کے مطابق کسی بھی قسم کے فوجی و دفاعی آپریشنز یا حساس سیکیورٹی تحرک کی فلم بندی کرنا اور ان مناظر کو ڈیجیٹل و میڈیا پلیٹ فارمز پر پھیلانا مملکت کی قومی سلامتی کے لیے براہ راست خطرہ تصور کیا جائے گا۔ حکام نے واضح کیا ہے کہ قومی سلامتی اور ملک کے دفاعی امور پر کوئی بھی سمجھوتہ نہیں کیا جائے گا، اور اس قانون کی خلاف ورزی میں ملوث افراد کے خلاف سخت ترین قانونی و تادیبی کارروائی عمل میں لائی جائے گی۔