پاکستان اور آئی ایم ایف کے درمیان مذاکرات رواں ہفتے مکمل ہوجائیں گے

پاکستان اور انٹرنیشنل مانیٹری فنڈ (آئی ایم ایف) کے درمیان جاری معاشی مذاکرات رواں ہفتے مکمل ہو جائیں گے۔ وزارت خزانہ کے ذرائع کے مطابق آئی ایم ایف نے پاکستان کے زرمبادلہ کے ذخائر کو مستحکم قرار دیتے ہوئے اطمینان کا اظہار کیا ہے اور جولائی سے ستمبر کے دوران ایف بی آر کی جانب سے ٹیکس اہداف کے حصول کو خوش آئند قرار دیا ہے۔ مذاکرات کے دوران اسٹیٹ بینک نے زرمبادلہ کے ذخائر 26.8 ارب ڈالر (بشمول کمرشل بینکوں کے ذخائر) اور افراط زر پر قابو پانے کے اقدامات سے آگاہ کیا۔ آئی ایم ایف وفد کی جانب سے میمورنڈم آف اکنامک اینڈ فنانشل پالیسیز (MEFP) کا مسودہ شیئر کیے جانے کے بعد تقریباً 1.2 ارب ڈالر کی اگلی قسط کے لیے اسٹاف لیول معاہدے کی راہ ہموار ہو جائے گی۔