امریکا کی غیر ملکی مالیاتی اداروں کو ایران سے لین دین پر پابندیوں کی دھمکی

امریکی محکمہ خزانہ نے عالمی سطح پر غیر ملکی مالیاتی اداروں اور بینکوں کو سخت ترین انتباہ جاری کرتے ہوئے خبردار کیا ہے کہ اگر انہوں نے ایران یا اس کے بینکاری شعبے کے ساتھ کسی بھی قسم کا کاروباری لین دین جاری رکھا تو انہیں فوری طور پر امریکی سیکنڈری پابندیوں (Secondary Sanctions) کا سامنا کرنا پڑ سکتا ہے۔ واشنگٹن نے واضح کیا ہے کہ پابندیوں کی زد میں آئے ایرانی مالیاتی اداروں کے ساتھ تجارت یا فنڈز کی منتقلی میں ملوث غیر ملکی بینکوں کے خلاف کسی بھی پیشگی اطلاع کے بغیر کارروائی عمل میں لائی جا سکتی ہے۔

امریکی حکام نے تمام عالمی اداروں سے مطالبہ کیا ہے کہ وہ ایران کے ساتھ تمام تر مالی و تجارتی تعلقات فوری طور پر قطع کریں۔ رواں سال فروری کے آخر میں ایران کے خلاف امریکا کی جانب سے فوجی کارروائیوں کے آغاز کے بعد سے خطے میں صورتحال شدید کشیدہ ہے، جبکہ ایرانی جوابی کارروائیوں اور اہم تجارتی سمندری راستوں کی ناکہ بندی کے باعث عالمی سطح پر توانائی اور کھاد کی قیمتوں میں تاریخی اضافہ دیکھا گیا ہے۔ واشنگٹن نے اگست سے تہران کو معاشی طور پر مکمل تنہا کرنے کی مہم میں مزید شدت پیدا کر دی ہے۔