وائٹ سی ایگل راستہ بھٹک کر سندھ آپہنچا، نایاب پرندے کی آنکھیں سی کر پر کاٹ دیے گئے

سکینڈینیویا اور سائبیریا جیسے شدید سرد خطوں میں پایا جانے والا اور پاکستان میں انتہائی نایاب گردانا جانے والا طاقتور شکاری پرندہ ’سفید دم عقاب‘ (وائٹ ٹیلڈ سی ایگل) شدید موسم اور خطے کی صورتحال کے باعث راستہ بھٹک کر سندھ پہنچ گیا، جسے مقامی شکاریوں نے پکڑ کر قید کر لیا۔ بے رحم شکاریوں نے اس نایاب عقاب کو شکار کے لیے استعمال کرنے کی غرض سے اس کی آنکھوں کو سوئی دھاگے سے سی دیا اور اڑنے سے روکنے کے لیے اس کے پر بھی کاٹ ڈالے۔ سندھ وائلڈ لائف کی ٹیم نے نومبر 2025ء میں ہارون کی سربراہی میں کارروائی کرتے ہوئے اس قیمتی عقاب کو سکھر سے کامیابی سے ریسکیو کر لیا۔

وائلڈ لائف ماہرین کے مطابق سفید دم عقاب کو پاکستان میں ‘نایاب موسمِ سرما کا مہمان’ کہا جاتا ہے، اور پوری بیسویں صدی کے دوران ملک میں اس پرندے کی آمد کے صرف 12 سے 15 کے قریب مستند ریکارڈ ہی سامنے آئے ہیں۔ سندھ میں اس تاریخی اور نایاب پرندے کی موجودگی جنگلی حیات کی دیکھ بھال اور تحفظ کی تاریخ میں ایک انتہائی اہم واقعہ قرار دی جا رہی ہے، جبکہ ریسکیو کے بعد اس کی نگہداشت اور بحالی کی کوششیں کی جا رہی ہیں۔