مذاکرات شروع ہونا بڑی کامیابی، سلسلہ ٹوٹنا نہیں چاہیے: فواد چودھری

سابق وفاقی وزیر فواد چوہدری نے ملک میں موجودہ سیاسی صورتحال پر بات کرتے ہوئے کہا ہے کہ تحریک انصاف اور حکومت کے درمیان مذاکرات کا آغاز ایک بڑی کامیابی ہے اور پی ٹی آئی کو اس موقع کو ضائع کیے بغیر آگے بڑھنا چاہیے۔ نجی ٹی وی کے پروگرام ’بات نکلے گی‘ میں گفتگو کرتے ہوئے انہوں نے کہا کہ جمہوری عمل میں مشکلات آتی رہتی ہیں، لیکن ایک بڑا طبقہ ایسا ہے جو نہیں چاہتا کہ بات چیت کامیاب ہو، اس لیے گفتگو کا سلسلہ کسی صورت ٹوٹنا نہیں چاہیے۔

انہوں نے تجویز دی کہ بانی پی ٹی آئی سے موجودہ قیادت کے بجائے ایسے سینئر رہنماؤں کی ملاقات کرائی جائے جو ان سے کھل کر بات کر سکیں، کیونکہ موجودہ قیادت میں شامل بعض رہنما کاؤنٹر آرگومنٹ نہیں کر پاتے۔ انہوں نے مزید کہا کہ حکومت میں بھی دو مختلف گروپس موجود ہیں، جن میں سے وفاقی وزیر داخلہ محسن نقوی کا کردار مذاکرات کی حد تک انتہائی مثبت رہا ہے۔ فواد چوہدری نے زور دیا کہ مذاکرات کے لیے پہلے سازگار ماحول بنایا جائے، جس کے لیے کارکنوں کی رہائی اور اڈیالہ جیل کے قیدیوں کو طبی سہولیات کی فراہم جیسے اقدامات کیے جانے چاہئیں۔