امریکی شہری کو کھدائی کے دوران 6.03 قیراط کا ہیرا مل گیا

امریکی ریاست آرکنساس کے کریٹر آف ڈائمنڈز سٹیٹ پارک (Crater of Diamonds State Park) میں امریکی بحریہ کے ایک ریزروسٹ نے کھدائی کے دوران 6.03 قیراط کا نایاب ہیرا دریافت کر لیا، جس کی ممکنہ عالمی مارکیٹ میں مالیت 10 لاکھ ڈالر (تقریباً 28 کروڑ پاکستانی روپے) سے زائد بتائی جا رہی ہے۔ 12 سال سے شوقیہ طور پر قیمتی پتھروں کی تلاش میں مصروف جیک پیراڈن نامی یہ شخص اس وقت ہیرا دریافت کرنے میں کامیاب ہوا جب وہ سوشل میڈیا پلیٹ فارم ٹک ٹاک (TikTok) پر اپنی تلاش کو لائیو نشر کر رہا تھا۔

جیک پیراڈن نے بجری سے بھری بالٹی کو دھونے کے بعد جب اسے ڈیسک پر انڈیلا تو اسے ناخن کے برابر چمکتا ہوا پتھر نظر آیا، جسے دیکھتے ہی وہ خوشی سے چلا اٹھا۔ یہ رواں سال کریٹر آف ڈائمنڈز سٹیٹ پارک سے برآمد ہونے والا اب تک کا سب سے بڑا ہیرا ہے۔ جواہرات کے ماہرین کے مطابق اگرچہ اس کی اوپن مارکیٹ میں حتمی قدر کا تعین ہونا باقی ہے، تاہم اس حجم اور کوالٹی کے ہیرے کی کم از کم قیمت 2 لاکھ 50 ہزار ڈالر سے لے کر 10 لاکھ ڈالر تک ہو سکتی ہے۔