66 ہزار لوگ آف لوڈ ،ڈی جی ایف آئی اے کا قائمہ کمیٹی برائے اوورسیز پاکستانیز کے اجلاس میں انکشاف

ڈی جی ایف آئی اے: غیر قانونی بیرون ملک سفر روکنے کے لیے جدید نظام اور سخت اقدامات

اسلام آباد: قومی اسمبلی کی قائمہ کمیٹی برائے اوورسیز پاکستانیز کے اجلاس میں ڈی جی ایف آئی اے نے بیرون ملک غیر قانونی سفر اور آف لوڈ ہونے والے مسافروں کے حوالے سے تفصیلی بریفنگ دی۔ اجلاس میں بتایا گیا کہ اس سال مجموعی طور پر 66 ہزار پاکستانی مسافر آف لوڈ کیے گئے، جن میں سے 15 ہزار افراد فوگ اور موسمی وجوہات کی بنا پر اور باقی 51 ہزار دیگر وجوہات کی بنیاد پر آف لوڈ ہوئے

ڈی جی ایف آئی اے نے بتایا کہ آف لوڈنگ صرف دستاویزات، ڈیٹا اور آن لائن ویریفکیشن کی بنیاد پر کی جاتی ہے اور کسی بھی مسافر کو سیاسی یا وی آئی پی دباؤ پر کلیئر نہیں کیا گیا۔ انہوں نے بتایا کہ بدعنوانی میں ملوث 180 اہلکار کو نوکری سے برطرف کیا جا چکا ہے۔

اجلاس میں مزید بتایا گیا کہ سعودی عرب نے 24 ہزار، دوبئی نے 6 ہزار اور آزربیجان نے 2,500 پاکستانیوں کو ڈی پورٹ کیا۔ دوبئی نے پاکستانیوں کے لیے ویزا بھی بند کر دیا ہے۔ بعض افراد عمرے کے نام پر یورپ جانے کی کوشش کر رہے تھے، لیکن آف لوڈ کیے گئے۔

ڈی جی ایف آئی اے کے مطابق پاکستان کے پاسپورٹ کی رینکنگ غیر قانونی سفر کی روک تھام کی وجہ سے 118 سے بڑھ کر 92 نمبر تک آ گئی ہے۔ اب پاکستان غیر قانونی یورپ سفر کے لحاظ سے ٹاپ فائیو ممالک میں شامل نہیں رہا۔اجلاس میں بتایا گیا کہ جنوری کے وسط میں EME ایپلیکیشن لانچ کی جائے گی، جس کے ذریعے بیرون ملک جانے والے افراد روانگی سے 24 گھنٹے قبل امیگریشن کلیئرنس حاصل کر سکیں گے۔ایف آئی اے نے کہا کہ آف لوڈ کیے گئے مسافروں کی اکثریت وزٹ، عمرہ اور ورک ویزا کی کیٹیگری سے تھی اور ایئرپورٹس پر مصنوعی ذہانت (AI) کے ذریعے مشتبہ کیسز کی پیشگی نشاندہی کی جا رہی ہے۔اجلاس میں یہ بھی بتایا گیا کہ ایک جعلی فٹ بال کلب نے جاپان میں فٹ بال ٹیم بھیجی، جس میں ایک لنگڑا شخص بھی جاپان پہنچ گیا، جبکہ تحقیقات سے معلوم ہوا کہ 2022 میں بھی اسی جعلی کلب کو جاپان بھیجا گیا تھا