حکومت اور پی ٹی آئی قیادت کے درمیان ملاقات، تمام بات چیت راز میں رکھنے پر زور

اسلام آباد میں اسپیکر قومی اسمبلی سردار ایاز صادق کی زیرِ صدارت حکومت اور اپوزیشن کے مذاکراتی وفود کا اہم اجلاس جاری ہے، جہاں نمازِ جمعہ کے وقفے کے بعد مذاکرات کا دوسرا دور شروع ہو چکا ہے۔ اجلاس میں تحریک انصاف کے چیئرمین بیرسٹر گوہر، سینیٹ میں اپوزیشن لیڈر علامہ ناصر عباس، اسد قیصر، اور عامر ڈوگر جبکہ حکومت اور اتحادیوں کی جانب سے محسن نقوی، رانا ثناء اللہ، نوید قمر، شیری رحمان، طلال چوہدری، امیر مقام اور طارق فضل چوہدری شرکت کر رہے ہیں۔ اجلاس کے دوران وفاقی وزیر محسن نقوی نے دونوں وفود کو خیبرپختونخوا میں دہشت گردی کی موجودہ صورتحال اور سکیورٹی امور پر تفصیلی بریفنگ دی۔ اس سے قبل صدرِ مملکت آصف علی زرداری اور وزیراعظم شہباز شریف کے درمیان بھی ملاقات ہوئی تھی جس میں کے پی کی سکیورٹی صورتحال پر گہری تشویش کا اظہار کیا گیا تھا۔ پی ٹی آئی چیئرمین بیرسٹر گوہر نے میڈیا سے گفتگو کرتے ہوئے کہا کہ وہ بغیر کسی پیشگی شرط اور پورے خلوص کے ساتھ مذاکرات میں شریک ہیں، اور یہ بات چیت محض فوٹو سیشن تک محدود نہیں ہونی چاہیے۔ ادھر حکومتی رہنماؤں نے بھی امید ظاہر کی ہے کہ سیاسی بحران اور ممکنہ لانگ مارچ کے تنازعات کا حل بات چیت کے ذریعے ہی نکالا جائے گا۔