وفاقی وزیر خزانہ محمد اورنگزیب اور عالمی بینک کے وفد کی ملاقات،

اسلام آباد میں وفاقی وزیر خزانہ سینیٹر محمد اورنگزیب سے عالمی بینک کے اعلیٰ سطح کے وفد نے ملاقات کی، جس میں ملک میں جاری معاشی اصلاحات میں پیش رفت اور ان کے آئندہ نفاذ کی ترجیحات کا جائزہ لیا گیا۔ اعلامیے کے مطابق ملاقات کے دوران پاکستان میں ترقی، روزگار کے مواقع، سرمایہ کاری کے ماحول کی بہتری اور کاروباری رکاوٹوں میں کمی کے لیے اقدامات پر تفصیلی بات چیت کی گئی۔ وزیر خزانہ نے اس بات پر زور دیا کہ معاشی اصلاحات کو عملی اقدامات میں تبدیل کرنے کی ضرورت ہے اور حکومت مالیاتی و قرضوں کے پائیدار نظام کے لیے مؤثر اقدامات جاری رکھے گی۔ ملاقات میں چھوٹے اور درمیانے درجے کے کاروباری اداروں (SMEs) کے لیے فنانسنگ تک رسائی بہتر بنانے، ایگزم بینک کے ذریعے برآمدی فنانس مصنوعات کی ترقی، اور وزیراعظم ایکسیس ٹو فنانس اقدام کو مزید مؤثر بنانے پر اتفاق کیا گیا۔ اس کے علاوہ دواسازی، طبی مصنوعات، زراعت، بیجوں کی رجسٹریشن، زرعی اجناس کی ڈی ریگولیشن، قومی ٹیرف پالیسی پر عمل درآمد اور لیبر مارکیٹ کی ضروریات سے ہم آہنگی جیسے امور بھی زیرِ بحث لائے گئے۔