پیٹرول سبسڈی اور گیس کمپنیوں کے واجبات پر حکومت اور آئی ایم ایف کے درمیان ڈیڈلاک برقرار

اسلام آباد میں پیٹرولیم مصنوعات پر سبسڈی اور گیس سیکٹر کے مالیاتی امور پر حکومت اور بین الاقوامی مالیاتی فنڈ (آئی ایم ایف) کے درمیان مذاکرات میں اہم امور پر اتفاق نہیں ہو سکا۔ ذرائع کے مطابق آئی ایم ایف نے ایندھن پر سبسڈی مکمل طور پر ختم کرکے صرف ہدفی ریلیف دینے پر اصرار کیا ہے، جبکہ حکومت نے موٹر سائیکل اور چھوٹی گاڑیوں کے لیے فیول ریلیف اسکیم فوری ختم نہ کرنے کا فیصلہ کیا ہے۔ ذرائع کا کہنا ہے کہ تین ماہ کی اس فیول سبسڈی کی لاگت 75 ارب روپے سے تجاوز کر سکتی ہے۔ پاکستان کی جانب سے بریفنگ میں بتایا گیا کہ درآمدی پیٹرول کی قیمت تقریباً 250 روپے ہے جو صارفین کو 390 روپے فی لیٹر میں فروخت ہو رہا ہے، جس میں تقریباً 110 روپے فی لیٹر ٹیکس اور 27 روپے مختلف مارجنز شامل ہیں۔ دوسری جانب گیس کمپنیوں کے 1.4 ٹریلین روپے کے قابل وصول واجبات معاف کرنے کے معاملے پر بھی اختلاف پایا جاتا ہے جبکہ گیس سیکٹر کے گردشی قرضے کا حجم 3.6 ٹریلین روپے تک پہنچ چکا ہے۔ حکومت نے او جی ڈی سی، پی پی ایل اور جی ایچ پی ایل کے 850 ارب روپے کے اضافی منافع اور ٹیرف ڈیفرنس کلیمز کے ذریعے قرضہ نمٹانے کی تجویز پیش کی ہے، تاہم آئی ایم ایف نے اسے مالی طور پر غیر جانبدار نہ قرار دیتے ہوئے تحفظات کا اظہار کیا ہے۔ اس کے باوجود آئی ایم ایف نے گیس سیکٹر میں اصلاحات اور گیس چوری میں کمی کی کوششوں کو سراہا ہے جبکہ گیس سیکٹر کے گردشی قرضے کے انتظامی منصوبے پر تفصیلی اجلاس آئندہ ہفتے متوقع ہے۔