وفاقی وزیر احسن اقبال کا انٹرنیشنل ایجوکیشن سمٹ سے خطاب

وفاقی وزیر منصوبہ بندی احسن اقبال نے اسلام آباد میں منعقدہ انٹرنیشنل ایجوکیشن سمٹ سے خطاب کرتے ہوئے کہا کہ آج تعلیمی شعبے کی اہم شخصیات اس ایونٹ کا حصہ ہیں اور موضوع پاکستان کے مستقبل کے حوالے سے نہایت اہمیت کا حامل ہے۔

انہوں نے کہا کہ ماضی میں پاکستان نے صنعت اور زراعت کی ترقی کے بعد اب علمی صلاحیت پر توجہ دینا شروع کی ہے۔ “پاکستان نے ماضی میں جو ترقی کی اس کے اعداد و شمار فزیکل ہیں، لیکن ہارڈوئیر کے ساتھ سافٹ وئیر کی اہمیت سے انکار ممکن نہیں۔” انہوں نے کہا کہ ہم نے عمارتیں، شاہراہیں اور ڈیم بہت اچھے بنائے، لیکن ملکی ترقی میں تسلسل اور سیاسی استحکام نہ ہونے کی وجہ سے پالیسیز کا مطلوبہ اثر نہیں ہوا۔

احسن اقبال نے کہا کہ دنیا کے کامیاب ممالک میں پالسیز کی گارنٹی نہیں ہوتی، بلکہ پالیسی ایک بیج کی مانند ہے جس کی ترویج کے لیے سازگار ماحول ضروری ہے۔ ہماری ناکامی اس ماحول کو پیدا کرنے میں رہی ہے۔ امن اور سیاسی استحکام کے بغیر ترقی ممکن نہیں، اس لیے استحکام اور تسلسل کے لیے ریفارمز ناگزیر ہیں۔

وفاقی وزیر نے مزید کہا کہ علم اور عمل کے درمیان جو فاصلہ ہے اسے ختم کرنا ہوگا۔ “ہمارا سوشل اکنامک پلیٹ فارم فریکچر ہے، اور ہمیں سب سے زیادہ سماجی پسماندگی کو دور کرنے پر توجہ دینی ہوگی۔” انہوں نے بتایا کہ تازہ ترین رپورٹ کے مطابق ابادی 2.4 فیصد سے بڑھ کر 2.55 فیصد ہو گئی ہے، اور سوال اٹھایا کہ کیا ہمارے پاس اپنے بچوں کو تعلیم اور صحت کی سہولیات فراہم کرنے کے وسائل موجود ہیں۔