امریکا میں ہاؤسنگ قرضوں کی شرح 4 سال کی بلند ترین سطح پر پہنچ گئی

امریکہ میں ہاؤسنگ قرضوں (مارگیج) کی شرحِ سود میں ایک ہی ہفتے کے دوران گزشتہ چار سال کا سب سے بڑا اضافہ ریکارڈ کیا گیا ہے، جس کے نتیجے میں نئے گھر خریدنے کے خواہش مند امریکی شہریوں پر مالی دباؤ شدید ہو گیا ہے۔ امریکی ہاؤسنگ فائنانسنگ ادارے ‘فریڈی میک’ (Freddie Mac) کے جاری کردہ اعداد و شمار کے مطابق، 30 سالہ فکسڈ مارگیج کی اوسط شرح 7.03 فیصد سے بڑھ کر 7.28 فیصد تک پہنچ گئی ہے، جو گزشتہ تین سالوں کی بلند ترین سطح ہے۔ امریکہ میں مارگیج ریٹس میں مسلسل چھٹے ہفتے یہ اضافہ دیکھا گیا ہے۔

شرحِ سود میں اس تیز رفتار اضافے کی بنیادی وجہ امریکی 10 سالہ ٹریژری بانڈ کی ییلڈ میں مسلسل اضافہ ہے۔ امریکی معیشت کی توقعات سے بہتر شرحِ نمو، برقرار رہنے والی بلند افراطِ زر (مہنگائی) اور فیڈرل ریزرو کی جانب سے آنے والے دنوں میں مزید شرحِ سود بڑھانے کے امکانات نے بانڈ ییلڈز اور ہاؤسنگ مارگیج ریٹس کو اوپر دھکیل دیا ہے۔ گز شتہ سات ماہ کے دوران 30 سالہ مارگیج ریٹ میں 1.2 فیصد سے زائد کا اضافہ ہو چکا ہے، جس کی بڑی وجہ ایران پر امریکہ اور اسرائیل کے حملوں کے بعد عالمی سطح پر توانائی کی بڑھتی ہوئی قیمتیں اور افراطِ زر کا دباؤ ہے۔ شرحِ سود میں اس اضافے سے امریکی شہریوں کے لیے گھروں کی خرید و فروخت اور ری فنانسنگ کی طلب میں نمایاں کمی دیکھی جا رہی ہے۔