کراچی ایئرپورٹ پر کسٹمز کی کارروائی، 60 لاکھ روپے کا سامان برآمد

کراچی کے جناح انٹرنیشنل ایئرپورٹ پر پاکستان کسٹمز نے ایک کامیاب کارروائی کرتے ہوئے امریکہ سے آنے والے مسافر سے لاکھوں روپے مالیت کی جدید الیکٹرانک اشیاء اور دیگر قیمتی سامان برآمد کر لیا۔ کسٹمز حکام کے مطابق مسافر دوحہ کے راستے پرواز نمبر QR-604 کے ذریعے کراچی پہنچا تھا، جہاں ایکس رے اسکریننگ کے دوران اس کا سامان مشکوک محسوس ہونے پر کسٹمز عملے نے تفصیلی تلاشی لی۔

سامان کا معائنہ کرنے پر 6 عدد آئی فون 18 پرو میکس (iPhone 18 Pro Max)، 2 میک بک ایئر، 1 میک بک پرو، 2 میک منی، 9 ایپل واچز، 3 آئی پیڈ ایئر، 4 آئی پیڈ میجک کی بورڈ، 5 ایپل ایئر پوڈز، 8 میٹا گلاسز اور 7 برانڈڈ خواتین کے ہینڈ بیگز برآمد ہوئے۔ اس کے علاوہ سامان سے 3 کلوگرام کاسمیٹکس اور 9 پیکٹ ملٹی وٹامنز بھی ملے۔ کسٹمز حکام نے بتایا کہ برآمد شدہ سامان کی کل مالیت 60 لاکھ روپے سے زائد ہے، جسے کسٹمز ایکٹ 1969ء کے تحت ضبط کر کے مسافر کے خلاف مزید قانونی کارروائی کا آغاز کر دیا گیا ہے۔