امریکی وزیر دفاع کا فوج میں ’’خودکار جنگی کمانڈ‘‘ قائم کرنے کا اعلان

امریکی وزیر دفاع پیٹ ہیگسیتھ نے امریکی فوج کے تحت ایک نئی اختصاصی ‘خودکار جنگی کمانڈ’ (Autonomous Warfare Command) قائم کرنے کا باضابطہ اعلان کر دیا ہے۔ فور سٹار جنرل کی قیادت میں کام کرنے والی یہ نئی عسکری کمانڈ مکمل طور پر روبوٹک جنگی صلاحیتوں، خودمختار ڈرون سسٹمز اور مصنوعی ذہانت (AI) کے میدان میں امریکی پیش رفت کو وسعت دینے پر کام کرے گی۔

امریکی وزیر دفاع پیٹ ہیگسیتھ نے اپنے بیان میں کہا کہ جدید دور کی جنگوں کی رفتار روایتی دفاعی نظاموں کی تیاری سے کہیں زیادہ تیز ہو چکی ہے، جبکہ جدید ٹیکنالوجی نے انتہائی کم قیمت مگر حیرت انگیز طور پر درست حملہ آور نظاموں کی تیاری کو ممکن بنا دیا ہے۔ انہوں نے تاکید کی کہ امریکی فوج کو صرف تکنیکی معیار ہی نہیں بلکہ حربی آلات اور ڈرونز کی مقدار پر بھی توجہ مرکوز کرنا ہوگی۔ عالمی میڈیا رپورٹس کے مطابق یوکرین جنگ نے ڈرون ٹیکنالوجی کی اہمیت کو اجاگر کیا ہے جہاں روسی نقصانات کا 70 فیصد ڈرون حملوں سے منسلک ہے، تاہم ماہرین کا کہنا ہے کہ عسکری شعبے میں مصنوعی ذہانت کی تیز رفتار ترقی عالمی سکیورٹی کے لیے نئے خطرات بھی پیدا کر رہی ہے