امریکی عدالت نے غیر قانونی تارکین وطن کو تیسرے ملک بھیجے پر پابندی ختم کر دی

امریکی سپریم کورٹ نے تارکینِ وطن کے اخراج سے متعلق ایک اہم فیصلہ سناتے ہوئے انہیں ان کے آبائی ملک کے بجائے کسی ‘تیسرے ملک’ میں ڈی پورٹ (بے دخل) کیے جانے پر عائد عدالتی پابندی ختم کر دی ہے۔ عالمی میڈیا کی رپورٹس کے مطابق، قدامت پسند اکثریت رکھنے والی امریکی سپریم کورٹ نے صدر ڈونلڈ ٹرمپ کی انتظامیہ کی ہنگامی درخواست منظور کرتے ہوئے زیریں عدالت کے اس فیصلے کو معطل کر دیا جس نے تیسرے ملک میں ملک بدری کا عمل روک رکھا تھا۔

زیریں عدالت نے اپنے حکم میں شرط عائد کی تھی کہ بے دخل کیے جانے والے تارکینِ وطن کو پیشگی مکمل معلومات فراہم کی جائیں کہ انہیں کس ملک بھیجا جا رہا ہے تاکہ وہ وہاں لاحق ممکنہ خطرات سے متعلق عدالت سے رجوع کر سکیں۔ تاہم، سپریم کورٹ کے 9 رکنی بینچ میں شامل 3 لبرل ججز نے اس فیصلہ سازی کی مخالفت کی۔ ٹرمپ انتظامیہ نے موقف اپنایا ہے کہ متعدد تارکین اپنے اصل وطن جانے سے انکار کرتے ہیں، لہٰذا انہیں ان ممالک کے ساتھ معاہدوں کے تحت کسی تیسرے ملک میں منتقل کرنا قانونی اور انتظامی ضرورت ہے۔ امریکی حکومت نے ایسے کئی ممالک کو معاوضہ دے کر تارکین کی منتقلی کے معاہدے کر رکھے ہیں۔ سپریم کورٹ نے اس معاملے کی حتمی قانونی حیثیت کا جائزہ لینے کے لیے دسمبر میں باضابطہ سماعت مقرر کرنے پر بھی آمادگی ظاہر کی ہے۔