چین اور پاکستان ہر موسم کے سٹریٹجک تعاون کے شراکت دار ہیں، چینی سفیر

پاکستان میں متعین چینی سفیر جیانگ ژائی ڈونگ نے کہا ہے کہ چین اور پاکستان ہر موسم کے سٹریٹجک تعاون کے لازوال اور پائیدار شراکت دار ہیں۔ اسلام آباد میں چین کے قومی دن کی مناسبت سے منعقدہ ایک پروقار تقریب سے خطاب کرتے ہوئے چینی سفیر نے کہا کہ پاکستان اپنی اعلیٰ سفارتی بصیرت اور پالیسیوں کے باعث بین الاقوامی سطح پر انتہائی اہم اور متحرک کردار ادا کر رہا ہے۔

چینی سفیر نے کہا کہ پاکستان نے نہ صرف خطے بلکہ عالمی سطح پر امن، سکیورٹی اور استحکام کے تحفظ کے لیے نمایاں اور مثبت کردار ادا کیا ہے۔ انہوں نے اقوام متحدہ کی جنرل اسمبلی کے اجلاس سے وزیراعظم شہباز شریف کے خطاب کا حوالہ دیتے ہوئے کہا کہ انہوں نے عالمی فورم پر پاکستان کے قومی مفادات کا انتہائی مضبوطی اور جرات سے دفاع کیا۔ جیانگ ژائی ڈونگ کا مزید کہنا تھا کہ چین اور پاکستان ہر مشکل اور اچھے وقت میں ایک دوسرے کے ساتھ بھائیوں کی طرح کھڑے رہے ہیں، اور وزیراعظم شہباز شریف نے مختلف شعبوں میں پاک-چین عملی تعاون اور باہمی تعلقات کے فروغ کو ہمیشہ سرِ فہرست ترجیح دی ہے۔