عراق سے امریکی افواج کا انخلا مکمل، کل ’یوم خودمختاری‘ منانے کا اعلان

عراق میں دو دہائیوں سے زائد عرصے تک موجود رہنے کے بعد امریکی افواج نے آج عراق میں اپنا فوجی مشن باقاعدہ طور پر ختم کرنے کا اعلان کرتے ہوئے ملک سے مکمل انخلا مکمل کر لیا ہے۔

غیر ملکی خبر رساں ایجنسی کے مطابق امریکی مشن کے اختتام اور ملک کی آزادی کی خوشی میں عراقی فوج نے دارالحکومت بغداد اور نجف کی سڑکوں پر فوجی گاڑیوں کے ساتھ شاندار پریڈ کی۔ اس موقع پر عراقی وزیراعظم علی الزیدی نے ایک پروقار تقریب سے خطاب کرتے ہوئے یکم اکتوبر کو ’یومِ خودمختاری‘ کے طور پر منانے کا بھی اعلان کیا۔ عراقی حکومت کا یہ بھی ماننا ہے کہ غیر ملکی افواج کے مکمل انخلا سے ان ایران نواز دھڑوں کے پاس ہتھیار رکھنے کا جواز بھی ختم ہو جائے گا جو وہ اب تک سکیورٹی خطرات کی آڑ میں استعمال کرتے آئے ہیں

امریکہ اور عراق کے درمیان سال 2024 میں اس فوجی مشن کو مرحلہ وار ختم کرنے پر اتفاق طے پایا تھا، جس کے بعد امریکی فوجی آہستہ آہستہ ملک بھر کے اہم اڈوں سے نکل کر صرف شمالی کردستان کے خود مختار علاقے تک محدود ہو چکے تھے، اور اب بالآخر مکمل انخلا عمل میں آ گیا ہے۔

یاد رہے کہ امریکی افواج نے 2003 میں اس وقت کے عراقی صدر صدام حسین کی حکومت کا تختہ الٹنے کے لیے عراق پر حملہ کیا تھا۔ اگرچہ 2011 کے اختتام پر امریکی افواج ایک بار عراق سے واپس چلی گئی تھیں، تاہم تین سال بعد یعنی 2014 میں جب داعش (ISIS) نے عراق کے ایک تہائی حصے پر خونریز قبضہ کر لیا تھا، تو امریکی افواج نے ایک بار پھر عراق میں واپسی کی تھی۔