بینظیر بھٹو شہیدیونیورسٹی لیاری کے وائس چانسلر نے سیاسی دباؤ بڑھنے پر عہدے سے استعفیٰ دے دیا

بینظیر بھٹو شہید یونیورسٹی لیاری کے وائس چانسلر پروفیسر حسین مہدی نے شدید سیاسی دباؤ اور دھمکیوں کے بعد اپنے عہدے سے باضابطہ استعفیٰ دے دیا ہے۔ وائس چانسلر نے اپنا استعفیٰ وزیراعلیٰ سندھ مراد علی شاہ کو ارسال کر دیا ہے۔ جیو نیوز سے گفتگو کرتے ہوئے پروفیسر حسین مہدی نے انکشاف کیا کہ یونیورسٹی میں قائم بدعنوانی، گھوسٹ ملازمین اور ہراسانی کے کیسز میں ملوث افسران کے خلاف قانونی کارروائی کرنے پر سیاسی شخصیات کی جانب سے ان پر مسلسل غیر قانونی کاموں کا دباؤ ڈالا جا رہا تھا اور انہیں یونیورسٹی کے انتظامی امور چلانے سے روکا جا رہا تھا۔

پروفیسر حسین مہدی کا مزید کہنا تھا کہ انہیں یونیورسٹی کے سابق وائس چانسلر ڈاکٹر اختر بلوچ جیسے المناک انجام کی دھمکیاں بھی دی گئیں، جس کے باعث انہوں نے اپنی عزت اور وقار کی خاطر عہدہ چھوڑنے کا فیصلہ کیا۔ یونیورسٹی کے ممبرانِ سینڈیکیٹ نے بھی تصدیق کی ہے کہ لیاری سے منتخب مقامی ایم پی اے انتظامی کاموں میں مسلسل رکاوٹیں ڈال رہے تھے اور وائس چانسلر پر بے جا دباؤ بڑھا رہے تھے جو بالآخر ان کے استعفے کا سبب بنا۔ واضح رہے کہ سابق وائس چانسلر ڈاکٹر اختر بلوچ پر بھی ایک خاتون ایم پی اے نے ہراسانی کا الزام عائد کیا تھا جس کے بعد وزیراعلیٰ سندھ نے انہیں عہدے سے ہٹا دیا تھا۔