سعودی ولی عہد کی زیر صدارت کابینہ کا اجلاس، مکہ دفاعی معاہدے کے سیکرٹریٹ کے قیام میں پیشرفت کا جائزہ

سعودی عرب کے دارالحکومت ریاض میں ولی عہد و وزیراعظم شہزادہ محمد بن سلمان کی زیرِ صدارت سعودی کابینہ کا ایک انتہائی اہم اجلاس منعقد ہوا، جس میں علاقائی و بین الاقوامی سکیورٹی صورتحال کا تفصیلی جائزہ لیا گیا۔ اجلاس کے دوران اہم بحری راہداریوں بشمول آبنائے ہرمز، باب المندب، بحیرہ احمر اور خلیجِ عدن میں بین الاقوامی جہاز رانی کی آزادی کو ہر قیمت پر یقینی بنانے پر زور دیا گیا۔ اس کے علاوہ کابینہ نے آبنائے ہرمز میں کشیدگی ختم کر کے حالات کو 28 فروری سے قبل کی مستحکم سطح پر بحال کرنے کی اہمیت پر خصوصی توجه دی۔

اجلاس کے دوران مکہ دفاعی مشترکہ معاہدے کے سیکرٹریٹ کے قیام میں پیشرفت اور بالخصوص سعودی عرب، پاکستان اور ترکیہ کے درمیان سہ فریقی دفاعی تعاون کے فریم ورک کا جامع جائزہ لیا گیا۔ سعودی کابینہ نے بحیرہ احمر اور باب المندب میں تجارتی جہازوں پر حوثی ملیشیا کے جاری حملوں کی شدید الفاظ میں مذمت کرتے ہوئے اس حوالے سے اقوامِ متحدہ کی سلامتی کونسل کے مذمتی بیان کا خیرمقدم کیا۔ اجلاس میں عزم ظاہر کیا گیا کہ خطے میں امن، سلامتی اور معاشی و بحری استحکام کے تحفظ کے لیے اتحادی ممالک کے ساتھ قریبی تعاون جاری رکھا جائے گا۔