امریکا اور اسرائیل اب ایران میں اندورنی تقسیم پیدا کرنا چاہتے ہیں: مسعود پزشکیاں

ایرانی صدر مسعود پزشکیان نے کہا ہے کہ امریکہ اور اسرائیل فوجی ذرائع اور جنگ کے ذریعے ایران کو جھکانے میں مکمل طور پر ناکام ہو چکے ہیں، اور اب وہ اس ناکامی کے بعد ملک کے اندرونی اختلافات کو ہوا دینے اور عوام میں تقسیم پیدا کرنے کی مذموم حکمتِ عملی پر عمل پیرا ہیں۔

اپنے ایک بیان میں ایرانی صدر کا کہنا تھا کہ ان تمام دباؤ کے باوجود تہران اپنے تمام ہمسایہ اور دوست ممالک کے ساتھ قریبی تعلقات برقرار رکھے ہوئے ہے، اور عراق، پاکستان، آذربائیجان سمیت دیگر دوست ممالک ایران کے ساتھ بہترین تعاون جاری رکھے ہوئے ہیں۔ انہوں نے تنقید کرتے ہوئے کہا کہ امریکی صدر دنیا کے دوسرے سرے سے بیٹھ کر دھمکیاں اور احکامات صادر کرتے ہیں، اور بعض ممالک ان کے احکامات پر عمل بھی کرتے ہیں، لیکن ایران موجودہ اقتصادی اور سیاسی مشکلات کے باوجود اپنے دوست اور ہمسایہ ممالک کے ساتھ سفارتی روابط کو ہر صورت جاری رکھے گا۔

صدر مسعود پزشکیان نے زور دیا کہ اس مشکل وقت میں ملک کو کمزور کرنے کی بجائے قومی یکجہتی، باہمی اتحاد اور تعاون کو فروغ دیا جانا چاہیے، کیونکہ صرف اندرونی اتفاقِ رائے اور اتحاد کے ذریعے ہی دشمن کی ان سازشوں اور عزائم کو شکست دی جا سکتی ہے۔