عراق سے امریکی افواج کا دو دہائیوں بعد انخلا شروع

عراق سے دو دہائیوں سے زائد عرصے کے بعد امریکی افواج کا حتمی انخلا باضابطہ طور پر شروع ہو گیا ہے۔ امریکی افواج ملک میں اپنے آخری فوجی اڈوں سے بھی اپنا انخلا مکمل کر رہی ہیں۔ یہ تاریخی انخلا 2024ء میں طے پانے والے معاہدے کے تحت عمل میں آ رہا ہے جسے اب امریکی صدر ڈونلڈ ٹرمپ کی انتظامیہ کے دور میں مکمل کیا جا رہا ہے۔ عراق میں 20 سال سے زائد عرصے پر محیط اس عسکری موجودگی کے دوران تقریباً 4,500 امریکی فوجی ہلاک ہوئے۔

امریکی فوج سب سے پہلے 2003ء میں صدام حسین کی حکومت کا تختہ الٹنے کے لیے عراق میں داخل ہوئی تھی، اور بعد ازاں 2011ء میں ابتدائی انخلا کے بعد 2014ء میں داعش کے خلاف جنگ کے لیے دوبارہ واپس آئی تھی۔ ایران اور خطے میں اس کے اتحادی گروہوں نے امریکی انخلا کا پرجوش خیرمقدم کرتے ہوئے اسے خطے سے امریکی عسکری موجودگی کے خاتمے کی جانب اہم پیش رفت اور اپنی تاریخی فتح قرار دیا ہے۔ دوسری جانب، عراقی سکیورٹی ماہرین نے اندیشہ ظاہر کیا ہے کہ امریکی افواج کے جانے سے عراق میں ایران نواز مسلح گروہوں کے اثر و رسوخ اور تسلط میں مزید اضافہ ہو سکتا ہے۔