عوامی مینڈیٹ سے اقتدار میں آئے، ہر پالیسی عوام کیلئے ہونی چاہئے: سہیل آفریدی

خیبرپختونخوا کے وزیراعلیٰ سہیل آفریدی نے ایک تقریب سے خطاب کرتے ہوئے کہا ہے کہ ہم عوامی مینڈیٹ کے ساتھ اقتدار میں آئے ہیں اور ہماری ہر پالیسی کا مرکز صرف اور صرف عوام کی فلاح و بہبود ہونی چاہیے، کیونکہ عوامی مینڈیٹ سے اقتدار میں آنے والوں کو ہی حقیقی معنوں میں عوام کی فکر ہوتی ہے۔

وفاقی حکومت پر کڑی تنقید کرتے ہوئے انہوں نے کہا کہ عوامی مینڈیٹ کے بغیر اقتدار میں آنے والے حکمران اربوں روپے کے جہاز اور لگژری گاڑیاں منگواتے ہیں، جبکہ ایس سی او (SCO) کانفرنس کے نام پر وفاقی حکومت نے اربوں کی گاڑیاں منگوائیں۔ انہوں نے کہا کہ پاکستان پہلے ہی شدید قرضوں میں ڈوبا ہوا ہے اور یہ لوگ چور دروازوں سے اقتدار میں آئے ہیں اس لیے انہیں عوام کے مسائل کا کوئی احساس نہیں۔ انہوں نے دعویٰ کیا کہ صوبے میں خواتین کے لیے پنک بسوں کے کرایوں میں 25 فیصد کمی کی جائے گی، جبکہ کے پی میں چادر اور چاردیواری کے تقدس کو پامال نہیں ہونے دیا جاتا اور ہر شہری کی عزت نفس کا تحفظ کیا جاتا ہے۔

صوبے میں امن و امان کی صورتحال پر بات کرتے ہوئے سہیل آفریدی نے کہا کہ دہشت گردی کے خلاف جنگ میں ہماری فوج اور پولیس کے بہادر جوان شہید ہوئے ہیں اور اس ناسور کی وجہ سے خیبرپختونخوا کے عوام کا خون بہہ رہا ہے۔ انہوں نے دوٹوک الفاظ میں کہا کہ اب بند کمروں کی پرانی پالیسیاں نہیں چلیں گی بلکہ پالیسیوں میں تبدیلی لائی جائے گی تاکہ کے پی کے عوام کا مزید خون نہ بہے، اور اگر ضرورت پڑی تو اس مقصد کے لیے بغاوت بھی کریں گے۔