آئینِ پاکستان کو نہ ماننے والوں سے کوئی بات نہیں ہوگی: فیصل کریم

خیبرپختونخوا کے گورنر فیصل کریم کنڈی نے پشاور میں میڈیا سے گفتگو کرتے ہوئے دوٹوک الفاظ میں کہا ہے کہ جو کوئی بھی پاکستان کے آئین کو تسلیم نہیں کرے گا، اس کے ساتھ کسی قسم کی کوئی بات چیت نہیں کی جائے گی، اور ہماری اولین ترجیح پاکستان بالخصوص خیبرپختونخوا میں پائیدار امن کا قیام ہے۔

تحریکِ انصاف کو چیلنج کرتے ہوئے گورنر کے پی نے کہا کہ پی ٹی آئی میں لانگ مارچ کرنے کی سکت نہیں ہے، یہ جماعت اس وقت بھی اسلام آباد جانے کے نام پر محض چھپتی پھر رہی ہے، اور جب عملی طور پر میدان سجے گا تبھی اصل صورتحال سامنے آئے گی۔ انہوں نے طنز کرتے ہوئے کہا کہ یہ لوگ صرف میڈیا پر بڑی بڑی بڑھکیں مارتے ہیں اور گرفتاریوں کے نام پر دراصل خود کو چھپانے کی کوشش کر رہے ہیں، کیونکہ عوام اب ان کے ساتھ نہیں ہیں۔

صوبے میں امن و امان کی صورتحال پر بات کرتے ہوئے فیصل کریم کنڈی کا کہنا تھا کہ خیبرپختونخوا میں دہشت گردی کے ناسور کو ہر صورت کنٹرول کیا جائے گا، اور دہشت گردوں یا ان کے سہولت کاروں کو کسی صورت معاف نہیں کیا جائے گا۔ انہوں نے مؤقف اپنایا کہ صوبے میں بڑھتی ہوئی دہشت گردی کو کنٹرول کرنا موجودہ صوبائی حکومت کے بس کی بات نہیں۔

آخر میں گورنر خیبرپختونخوا نے واضح کیا کہ آئینِ پاکستان کے اندر صوبے میں گورنر راج نافذ کرنے کا آئینی آپشن موجود ہے اور ضرورت پڑنے پر اس سے گریز نہیں کیا جائے گا۔