مری میں سکول وین حادثے کا شکار، 10 بچے جھلس کر زخمی

مری کے علاقے لوئر موہڑا بڑا ہوتر کے قریب سکول کے بچوں کو لے جانے والی ایک وین بے قابو ہو کر سڑک سے نیچے گہری کھائی میں جا گری، جس کے نتیجے میں گاڑی میں اچانک خوفناک آگ بھڑک اٹھی۔ اس افسوسناک حادثے میں وین میں سوار 10 بچے جھلس کر زخمی ہو گئے ہیں۔

حادثے کی اطلاع ملتے ہی ریسکیو 1122 کی قریبی ایمرجنسی ٹیمیں فوری طور پر جائے وقوعہ پر پہنچ گئیں۔ ریسکیو حکام کے مطابق، اہلکاروں نے انتہائی بہادری اور بروقت کارروائی کرتے ہوئے گاڑی میں پھنسے بچوں کو بحفاظت باہر نکالا، موقع پر ہی تمام زخمی بچوں کو ابتدائی طبی امداد فراہم کی گئی، اور پھر فوری طور پر تمام بچوں کو مزید علاج کے لیے سول ہسپتال مری منتقل کر دیا گیا۔

دوسری جانب، ریسکیو 1122 کی فائر فائٹنگ ٹیم نے بروقت کارروائی کرتے ہوئے گاڑی میں لگی آگ پر مکمل قابو پا لیا، جبکہ حادثے کے بعد جائے وقوعہ پر کولنگ کا عمل بھی کامیابی سے مکمل کر لیا گیا۔