ملتان میں نیشنل سائبر کرائم ایجنسی کے اسسٹنٹ ڈائریکٹر کو اغواء کرنے کی کوشش ناکام

ملتان: ملتان میں نامعلوم مسلح افراد نے نیشنل سائبر کرائم انویسٹی گیشن ایجنسی (این سی سی آئی اے) کے اسسٹنٹ ڈائریکٹر محمد ذیشان کو اغواء کرنے کی کوشش کی، تاہم وہ خوش قسمتی سے اس حملے میں محفوظ رہے۔

اسسٹنٹ ڈائریکٹر محمد ذیشان نے واقعے کی تفصیلات بتاتے ہوئے کہا کہ چار گاڑیوں میں سوار تقریباً 15 مسلح افراد، جن میں کچھ نقاب پوش تھے جبکہ بعض نے اپنی شناخت ظاہر کر رکھی تھی، ان کی رہائش گاہ ملتان ہومز پہنچے اور زبردستی گھر میں داخل ہونے کی کوشش کی۔ ان کا کہنا تھا کہ سی سی ٹی وی کیمروں میں ان افراد کی مشکوک نقل و حرکت دیکھتے ہی وہ عقبی دروازے سے نکلنے میں کامیاب ہوگئے۔

محمد ذیشان کے مطابق، اغواء کاروں نے ان کی عدم موجودگی پر ان کے اہل خانہ کو ڈرایا دھمکایا اور ان کی موجودگی کے بارے میں پوچھتے رہے۔ اغواء کی کوشش کے دوران ملزمان نے غلطی سے ان کے دوست علی کو محمد ذیشان سمجھ کر اغواء کر لیا۔ تاہم، تھوڑے فاصلے پر جا کر انہیں اپنی غلطی کا احساس ہوا اور دوست علی کو چھوڑ دیا۔

این سی سی آئی اے کے اسسٹنٹ ڈائریکٹر محمد ذیشان، جو کہ اپنے ادارے میں ریجن کے اہم کیسز کے انکوائری آفیسر بھی ہیں، نے بتایا کہ انہوں نے واقعے سے متعلق اپنے ادارے کے اعلیٰ افسران کو آگاہ کر دیا ہے۔ انہوں نے مزید کہا کہ انہیں تاحال اغواء کی کوشش کے محرکات اور اس میں ملوث افراد کے بارے میں کوئی علم نہیں ہے اور واقعے کی مزید تحقیقات جاری ہیں۔