سلامتی کونسل: پاکستان کا 1967 کی سرحدوں پر آزاد فلسطینی ریاست کے فوری قیام کا مطالبہ

نیو یارک (رپورٹ آئزہ عرفان) اقوام متحدہ کی سلامتی کونسل کے اہم اجلاس میں پاکستان کے نائب مستقل مندوب سفیر عثمان جدون نے مشرقِ وسطیٰ کی مجموعی صورتحال اور بالخصوص مسئلہ فلسطین (قرارداد 2334) پر پاکستان کا دوٹوک اور واضح موقف پیش کیا ہے۔ اجلاس سے خطاب کرتے ہوئے انہوں نے متنبہ کیا کہ قابض طاقت اسرائیل کی جانب سے مقبوضہ مغربی کنارے اور مشرقی یروشلم میں غیر قانونی آباد کاری میں توسیع، جبری بے دخلی اور زمینوں پر مسلسل قبضے کے ذریعے جغرافیائی و آبادیاتی ہیئت کو دانستہ طور پر تبدیل کیا جا رہا ہے تاکہ آزاد فلسطینی ریاست کے قیام کے امکانات کو ختم کیا جا سکے۔ انہوں نے E1 منصوبے اور 1,600 سے زائد آبادکاروں کے تشدد کے واقعات کی شدید مذمت کرتے ہوئے غیر قانونی بستیوں کی مصنوعات پر پابندیاں عائد کرنے والے برطانوی، فرانسیسی اور کینیڈین اقدامات کا خیرمقدم کیا۔

سفیر عثمان جدون نے غزہ کی دلدوز صورتحال پر تشویش کا اظہار کرتے ہوئے بتایا کہ جنگ بندی کے بعد بھی اسرائیلی جارحیت کے نتیجے میں 1,400 سے زائد فلسطینی شہید ہو چکے ہیں اور آبادی کو محض 30 فیصد محدود رقبے پر محصور کر دیا گیا ہے۔ انہوں نے سلامتی کونسل کی قرارداد 2803 اور نیویارک اعلامیے پر فوری و مکمل عملدرآمد کا مطالبہ کیا۔ پاکستانی مندوب نے واضح کیا کہ غزہ اور مغربی کنارہ ایک ناقابلِ تقسیم علاقائی وحدت ہیں اور دنیا کو 1967ء سے قبل کی سرحدوں پر مبنی، القدس الشریف کے دارالحکومت کے ساتھ ایک آزاد، خودمختار اور متصل فلسطینی ریاست کے قیام کے لیے معینہ مدت پر مبنی ناقابلِ واپسی سیاسی عمل کا فوری آغاز کرنا ہوگا۔