ٹرمپ انتظامیہ کا زائرین کی پروازیں بحال کرنے کیلئے ایران پر عائد پابندیوں میں نرمی کا فیصلہ

امریکی صدر ڈونلڈ ٹرمپ کی انتظامیہ نے ایران اور عراق کے درمیان زائرین کی پروازوں کی بحالی کے لیے ایران پر عائد اقتصادی پابندیوں میں آئندہ ایک ماہ کے لیے محدود نرمی کا اہم فیصلہ کیا ہے۔ اس فیصلے کے تحت امریکی محکمہ خزانہ عراقی قومی ایئر لائن ‘عراقی ایئر ویز’ کو عراق کے مقدس شہر نجف اور ایران کے مختلف شہروں کے درمیان پروازوں کی باقاعدہ اجازت دے گا، جبکہ بعد ازاں حالات کے جائزہ کی روشنی میں اس پابندی میں مستقل استثنیٰ فراہم کرنے پر بھی غور کیا جا سکتا ہے۔

مذہبی و انسانی ضرورتوں کو مدنظر رکھتے ہوئے عراق کی حکومت نے امریکی انتظامیہ سے طبی علاج، اعلیٰ تعلیم اور مذہبی زیارتوں سے وابستہ مسافروں کے لیے خصوصی استثنیٰ کی درخواست کی تھی۔ عراقی حکام نے قوی امید ظاہر کی ہے کہ نجف اور ایران کے درمیان تمام معطل شدہ پروازیں اگلے 48 گھنٹوں کے اندر دوبارہ شروع کر دی جائیں گی۔ واضح رہے کہ امریکی پابندیوں کے سبب عراق نے گزشتہ جمعے کو ایران کے لیے اپنی تمام تر پروازیں ہنگامی طور پر معطل کر دی تھیں، جس کے نتیجے میں زیارتوں کی غرض سے سفر کرنے والے لاکھوں زائرین اور مسافروں کو شدید سفری مشکلات کا سامنا کرنا پڑا تھا۔