گورنر راج کی دھمکیوں پر اپنے مؤقف سے پیچھے نہیں ہٹوں گا، سہیل آفریدی

وزیراعلیٰ خیبرپختونخوا سہیل خان آفریدی نے کہا ہے کہ وفاق کی جانب سے گورنر راج یا ایمرجنسی کے نفاذ کی دھمکیوں کے باوجود وہ اپنے نظریاتی مؤقف سے ایک انچ بھی پیچھے نہیں ہٹیں گے۔ امن و امان کی صورتحال کے حوالے سے منعقدہ ایک اعلیٰ سطحی اجلاس سے خطاب کرتے ہوئے وزیراعلیٰ خیبرپختونخوا نے سخت مؤقف اختیار کرتے ہوئے کہا کہ وہ ایسی کرسی یا اقتدار پر لعنت بھیجتے ہیں جو انہیں ان کے بنیادی نظریے اور اصولوں سے ہٹا دے۔ انہوں نے واضح کیا کہ خیبرپختونخوا کے عوام کی مرضی، خودمختاری اور عوامی مینڈیٹ کے برعکس کوئی بھی آئینی یا سیاسی اقدام قابلِ قبول نہیں ہوگا۔

اجلاس کے دوران صوبے میں امن و امان کی قائم سازی اور سیکورٹی اقدامات کا ذکر کرتے ہوئے سہیل آفریدی کا کہنا تھا کہ صوبائی حکومت نے امن کی بحالی کو اولین ترجیح دیتے ہوئے اپنے ترقیاتی بجٹ سے 35 ارب روپے کی بھاری کٹوتی کی اور یہ رقم خیبرپختونخوا پولیس کی وسائل اور صلاحیتوں میں اضافے کے لیے فراہم کی۔ انہوں نے تنقید کرتے ہوئے کہا کہ کچھ سیاسی عناصر اور حکام عقلِ کل بنے ہوئے ہیں اور خیبرپختونخوا کے اصل اسٹیک ہولڈرز، عوامی نمائندوں اور مقامی آبادی کی بات سننے یا سمجھنے کو تیار نہیں ہیں۔