اعظم نذیر تارڑ نے خیبر پختونخوا میں گورنر راج کا عندیہ دے دیا

وفاقی وزیر قانون و انصاف سینیٹر اعظم نذیر تارڑ نے کہا ہے کہ آئینِ پاکستان میں گورنر راج اور ایمرجنسی (حالتِ اضطرار) کے نفاذ کا پورا طریقہ کار اور آئینی ضوابط واضح طور پر موجود ہیں۔ وفاقی دارالحکومت میں میڈیا سے گفتگو کرتے ہوئے اعظم نذیر تارڑ کا کہنا تھا کہ اگر تمام آئینی شرائط پوری ہو جائیں اور ملک یا کسی صوبے میں ایسے حالات پیدا ہو جائیں جہاں آئین اجازت دیتا ہو، تو حکومت گورنر راج یا ایمرجنسی نافذ کرنے کا اختیار رکھتی ہے۔

دوسری جانب گورنر خیبرپختونخوا فیصل کریم کنڈی نے ایک نجی ٹی وی پروگرام میں گفتگو کرتے ہوئے کہا کہ ہمیں اس بات کا جائزہ لینا چاہیے کہ صوبے میں ایمرجنسی اور گورنر راج کی بحث کی نوبت کیوں آئی۔ انہوں نے صوبے کی امن و امان کی خراب صورتحال کی نشاندہی کرتے ہوئے بتایا کہ ڈیرہ اسماعیل خان میں خودکش حملہ اور ٹانک میں 3 ٹریفک پولیس اہلکاروں کی شہادت کے واقعات پیش آئے ہیں۔ فیصل کریم کنڈی نے مزید کہا کہ خیبرپختونخوا میں بدامنی کے ساتھ ساتھ گورننس کی ناکامی اور کرپشن جیسے سنگین مسائل بھی موجود ہیں، اور اگر حالات کا تقاضا ہوا تو وفاقی وزیر قانون کے بیان کے مطابق گورنر راج بھی نافذ کیا جا سکتا ہے۔