امریکا کا آبنائے ہرمز پر ایران کے مکمل کنٹرول کا دعویٰ مسترد

امریکی فوج نے پاسدارانِ انقلاب اور ایرانی عسکری حکام کی جانب سے آبنائے ہرمز پر مکمل کنٹرول کے دعوے کو سختی سے مسترد کرتے ہوئے کہا ہے کہ ایران آبنائے ہرمز کو کنٹرول نہیں کرتا۔

امریکی سینٹرل کمانڈ (سینٹ کام) کے ترجمان کی جانب سے جاری بیان میں کہا گیا ہے کہ ایران کے پاس اسٹریٹجک آبی گزرگاہ پر مؤثر کنٹرول کی صلاحیت رکھنے والی بحریہ موجود نہیں ہے، اور حالیہ عرصے میں امریکی فوج کی کارروائیوں اور عسکری دباؤ کے نتیجے میں ایرانی بحری صلاحیت کو شدید نقصان پہنچا ہے۔

سینٹ کام کا مؤقف ہے کہ آبنائے ہرمز پر ایران کے بے بنیاد دعوے کی سب سے بڑی دلیل یہ ہے کہ گزشتہ چند ماہ کے دوران ہزاروں تجارتی جہاز اس اہم آبی گزرگاہ سے بحفاظت گزر چکے ہیں۔ امریکی سینٹرل کمانڈ کے مطابق، امریکی اور اتحادی افواج نے آبنائے ہرمز سے گزرنے والے 2 ہزار سے زائد تجارتی جہازوں کی محفوظ آمدورفت میں کلیدی معاونت فراہم کی ہے، جبکہ اسی راستے سے ایک ارب بیرل سے زائد خام تیل بھی بحفاظت دیگر ممالک کو منتقل کیا جا  ہے۔

بیان میں مزید بتایا گیا کہ خطے میں تجارتی سپلائی لائن کو رواں رکھنے کے لیے امریکی اور اتحادی افواج نے آبنائے ہرمز کی مرکزی گزرگاہوں کو بارودی سرنگوں سے مکمل طور پر صاف کر دیا ہے، اور بین الاقوامی جہاز رانی کو لاحق خطرات کو زائل کرنے کے لیے تسلسل کے ساتھ حفاظتی اقدامات جاری رکھے جا رہے ہیں۔