4 اکتوبر کو احتجاج کیلئے پی ٹی آئی کی کوئی تیاری نہیں: عطا تارڑ

وفاقی وزیر اطلاعات و نشریات عطا اللہ تارڑ نے پارلیمنٹ کے باہر میڈیا سے غیر رسمی گفتگو کرتے ہوئے کہا ہے کہ تحریک انصاف (PTI) کی جانب سے 4 اکتوبر کو احتجاج کی کال دی گئی ہے، مگر زمینی حقائق یہ ہیں کہ اس احتجاج کے لیے پی ٹی آئی کی کوئی تیاری موجود نہیں ہے۔

عطا اللہ تارڑ نے سیاسی صورتحال پر بات کرتے ہوئے انکشاف کیا کہ تحریک انصاف کے ساتھ بیک ڈور بات چیت پہلے بھی چل رہی تھی اور سیاسی استحکام کے لیے آئندہ بھی اس طرح کے پسِ پردہ رابطے جاری رہ سکتے ہیں۔ انہوں نے واضح کیا کہ حکومت ہمیشہ مذاکرات اور افہام و تفہیم کے دروازے کھلے رکھتی ہے۔

صوبے کی مجموعی صورتحال پر تبصرہ کرتے ہوئے وزیر اطلاعات نے ایک بار پھر خیبرپختونخوا حکومت کو شدید تنقید کا نشانہ بنایا اور کہا کہ کے پی میں امن و امان کی ابتر صورتحال سب کے سامنے ہے اور صوبے میں دہشت گردی کے واقعات عروج پر پہنچ چکے ہیں۔ انہوں نے دوٹوک الفاظ میں کہا کہ خیبرپختونخوا کی صوبائی حکومت امن قائم کرنے اور دہشت گردی کے خلاف جنگ میں مکمل طور پر ناکام ہو چکی ہے۔

ایک سوال کے جواب میں عطا اللہ تارڑ کا کہنا تھا کہ خیبرپختونخوا میں گورنر راج کے نفاذ یا اس نوعیت کے کسی بھی دوسرے انتظامی اقدام کے حوالے سے ابھی سے کچھ کہنا قبل از وقت ہوگا۔