لاہور میں اجتماعی زیادتی کی شکار غیر ملکی لڑکی عدالت پیش، بیان قلمبند کرا دیا

لاہور کے پوش علاقے ڈیفنس میں آذربائیجان سے تعلق رکھنے والی ایک غیر ملکی لڑکی کے ساتھ پیش آنے والے مبینہ اجتماعی زیادتی کے واقعے میں اہم پیش رفت سامنے آئی ہے، جہاں متاثرہ لڑکی نے عدالت میں اپنا باضابطہ بیان قلمبند کروا دیا ہے۔

یاد رہے کہ یہ لرزہ خیز واقعہ دو روز قبل پیش آیا تھا، جس کا مقدمہ متاثرہ خاتون کی مدعیت میں تھانہ ڈیفنس سی میں درج کیا گیا تھا۔ پولیس حکام کے مطابق، آذربائیجان کی رہائشی 20 سالہ لڑکی چند روز قبل ہی سیر و تفریح یا وزٹ کے سلسلے میں لاہور آئی تھی۔

مقدمے کے متن اور پولیس تحقیقات کے مطابق، دو نامعلوم لڑکیاں مبینہ طور پر اس غیر ملکی لڑکی کو ورغلا کر ایک کیفے میں لے گئیں جہاں ان کے تین دیگر مرد دوست پہلے سے موجود تھے۔ ملزمان چالاکی کے ساتھ لڑکی کو کیفے سے نکال کر ایک فلیٹ پر لے گئے، جہاں مبینہ طور پر اسے نشہ آور چیز کھلائی اور پلائی گئی۔ ہوش و حواس معطل ہونے کے بعد تینوں ملزمان نے مبینہ طور پر اس کے ساتھ اجتماعی جنسی زیادتی کی۔

عدالت میں بیان قلمبند ہونے کے بعد پولیس نے تفتیش کے دائرہ کار کو مزید وسیع کر دیا ہے، جبکہ واقعے میں ملوث نامزد ملزمان اور سہولت کار لڑکیوں کی گرفتاری کے لیے چھاپے مارے جا رہے ہیں۔