🇺🇸 امریکی فوج میں بڑی تنظیمِ نو کی تیاری، فور اسٹار جنرلز کی تعداد کم ، کمانڈز کو یکجا کرنے کا منصوبہ

واشنگٹن: امریکی محکمہ جنگ (پینٹاگون) امریکی فوج کی اعلیٰ قیادت میں کئی دہائیوں کی سب سے بڑی تنظیمِ نو کی تیاری کر رہا ہے، جس کے تحت فور اسٹار جنرلز کی تعداد میں نمایاں کمی لانے اور بین الاقوامی فوجی کمانڈز کو یکجا کرنے کا منصوبہ ہے۔

امریکی میڈیا کی رپورٹوں کے مطابق، یہ اہم منصوبہ امریکی سیکرٹری جنگ پیٹ ہیگسیتھ کی ہدایت پر تیار کیا جا رہا ہے۔ ‘واشنگٹن پوسٹ’ نے اپنی رپورٹ میں بتایا ہے کہ اس منصوبے کا مقصد اعلیٰ سطح کی کمانڈز کو زیادہ مؤثر بنانا اور ان پر اخراجات کم کرنا ہے۔

منصوبے کی تفصیلات کے مطابق، امریکی سینٹرل کمانڈ، یورپین کمانڈ اور افریقن کمانڈ جیسی اہم بین الاقوامی کمانڈز کی حیثیت کم کرتے ہوئے انہیں ایک نئی ’یو ایس انٹرنیشنل کمانڈ‘ کے ماتحت لایا جا سکتا ہے۔ اس کے علاوہ، ان تمام جنرلز اور ایڈمرلز کی تعداد کو بھی کم کیا جائے گا جو براہِ راست سیکرٹری جنگ پیٹ ہیگسیتھ کو رپورٹ کرتے ہیں۔

اخبار کے مطابق، چیئرمین جوائنٹ چیفس آف اسٹاف ڈین کین آئندہ چند دنوں میں یہ جامع منصوبہ پیٹ ہیگسیتھ کو پیش کرنے والے ہیں۔ تاہم، پینٹاگون کے ترجمان نے فوری طور پر اس حساس معاملے پر کوئی تبصرہ کرنے سے گریز کیا ہے۔

یہ بات قابل ذکر ہے کہ پیٹ ہیگسیتھ نے مئی میں ہی امریکی فوج میں فعال فور اسٹار جنرلز اور ایڈمرلز کی تعداد میں کم از کم 20 فیصد کمی لانے کا حکم دیا تھا۔ رپورٹ میں بتایا گیا ہے کہ ان تبدیلیوں پر عملدرآمد کے لیے سیکرٹری جنگ کے ساتھ ساتھ امریکی صدر ڈونلڈ ٹرمپ کی حتمی منظوری بھی ضروری ہو گی۔