میر رضا علی قتل کیس: جوڈیشل کمیشن کی مدت ختم، کارروائی 2 اکتوبر تک ملتوی

سندھ حکومت کی جانب سے میر رضا علی کے قتل کیس کی غیر جانبدارانہ، منصفانہ اور شفاف تحقیقات کے لیے قائم کیے گئے جوڈیشل کمیشن کی مقررہ مدت ختم ہو گئی ہے، جس کے بعد کمیشن کی کارروائی 2 اکتوبر تک کے لیے ملتوی کر دی گئی ہے۔

جسٹس عمر سیال کی سربراہی میں کام کرنے والے کمیشن کی جانب سے اس حوالے سے تحریری حکم نامہ جاری کر دیا گیا ہے۔ حکم نامے میں کہا گیا ہے کہ کمیشن کی مدت گزشتہ روز پوری ہو چکی ہے، اور اس کی مدت میں 15 اکتوبر تک توسیع کے لیے باضابطہ درخواست سندھ حکومت کو ارسال کی جا چکی ہے۔

عدالتی حکم نامے میں بتایا گیا کہ سندھ حکومت کے فوکل پرسن نے کمیشن کو آگاہ کیا ہے کہ کمیشن کی مدت میں توسیع سے متعلق سمری وزیر اعلیٰ سندھ کی جانب سے منظور کی جا چکی ہے، تاہم حتمی منظوری کے لیے اسے سندھ کابینہ کو ارسال کر دیا گیا ہے۔

چونکہ سندھ کابینہ کا آئندہ اجلاس یکم اکتوبر کو متوقع ہے، اس لیے کمیشن کی کارروائی کو 2 اکتوبر تک ملتوی کرنا مناسب سمجھا گیا ہے۔ حکم نامے میں یہ بھی واضح کیا گیا ہے کہ اگر سندھ کابینہ نے کمیشن کی مدت میں توسیع کی منظوری نہ دی تو اس صورت میں مزید کسی گواہ کو طلب نہیں کیا جائے گا، اور اب تک ریکارڈ کیے گئے تمام بیانات کی بنیاد پر تحقیقاتی رپورٹ جلد از جلد حتمی شکل دے کر جمع کرا دی جائے گی۔ تاہم، اگر مدت میں توسیع کی جاتی ہے تو نئے گواہان کو طلب کرنے کے لیے نئے نوٹسز جاری کیے جائیں گے اور اس کے ساتھ ساتھ تین سینئر پولیس افسران کو تحریری سوالنامے بھی ارسال کیے جائیں گے۔