پاک بحریہ کی نئی شامل کی گئی آبدوز کی پہلی لائیو ویپن فائرنگ کامیابی سے مکمل

پاک بحریہ کی دفاعی صلاحیتوں اور جدید کاری کے سفر میں ایک تاریخی پیش رفت سامنے آئی ہے، جہاں پاک بحریہ کی جانب سے بیڑے میں شامل کی گئی جدید ‘ہنگور کلاس’ کی پہلی آبدوز پی این ایس ہنگور نے اپنے پہلے ہی لائیو ویپن فائرنگ کیپابیلٹی ٹیسٹ میں کامیابی کے جھنڈے گاڑ دیے ہیں۔ پاک فوج کے شعبہ تعلقات عامہ (آئی ایس پی آر) کے مطابق، آبدوز نے طویل فاصلے تک مار کرنے والے اینٹی شپ کروز میزائل کا انتہائی کامیاب تجربہ کرتے ہوئے سمندر میں موجود متعین ہدف کو انتہائی درستگی کے ساتھ نشانہ بنایا اور اپنی جنگی صلاحیتوں کا لوہا منوا لیا۔ اس لائیو فائرنگ مظاہرے کا براہِ راست مشاہدہ سربراہ پاک بحریہ ایڈمرل نوید اشرف نے کیا اور آبدوز کی غیر معمولی طاقت اور آپریشنل تیاریوں کی بھرپور تعریف کی۔

آئی ایس پی آر کا کہنا ہے کہ چین کے تعاون سے تیار کی جانے والی یہ جدید ترین ہنگور کلاس آبدوز پاکستان کی زیرِ آب جنگی صلاحیتیوں اور بحری سرحدوں کے دفاع میں چٹان کی مانند ثابت ہوگی۔ صدر مملکت آصف علی زرداری اور وزیراعظم شہباز شریف نے اس کامیاب تجربے پر پاک بحریہ کے سربراہ ایڈمرل نوید اشرف، تمام قیادت اور آپریشنل ٹیم کو دل کی گہرائیوں سے مبارکباد پیش کی۔ وزیراعظم شہباز شریف نے کہا کہ اینٹی شپ کروز میزائل کا یہ درست ترین ہدف پاک بحریہ کی اعلیٰ مہارت، پیشہ ورانہ کارکردگی اور جنگی صلاحیتوں کا منہ بولتا ثبوت ہے۔ ترجمان ایوانِ صدر کے مطابق، یہ آبدوز رواں سال 30 اپریل کو چین کے شہر سانیا میں منعقدہ تقریب کے دوران پاکستان کے حوالے کی گئی تھی، جس میں صدر زرداری مہمانِ خصوصی تھے۔