سہیل آفریدی کوبانی پی ٹی آئی کا مکمل اعتماد حاصل ہے، چیئرمین پی ٹی آئی

پاکستان تحریک انصاف (پی ٹی آئی) کے چیئرمین بیرسٹر گوہر علی خان نے واضح کیا ہے کہ وزیراعلیٰ خیبر پختونخوا سہیل آفریدی کو بانی پی ٹی آئی کا مکمل اور بھرپور اعتماد حاصل ہے اور پوری پارٹی وزیراعلیٰ کے تمام اقدامات میں ان کی مکمل حمایت کرے گی۔ میڈیا سے گفتگو کرتے ہوئے چیئرمین پی ٹی آئی بیرسٹر گوہر کا کہنا تھا کہ اس وقت ملک جن داخلی و سیکیورٹی چیلنجز سے گزر رہا ہے، تمام سیاسی و انتظامی دھڑوں کو یہ بات اچھی طرح سمجھنا ہوگی کہ یہ حالات کو مزید خراب یا پیچیدہ کرنے کا وقت نہیں ہے، بلکہ ہم سب کو مل کر ملک کے حالات بہتر بنانے کی مخلصانہ کوششیں کرنی چاہئیں۔

بیرسٹر گوہر علی خان نے کہا کہ موجودہ کشیدہ اور حساس صورتحال میں پارٹی اور صوبائی حکومت کی جانب سے ہر ممکن کوششیں کی جا رہی ہیں تاکہ معاملات کو مزید بگاڑ کی طرف جانے سے بچایا جا سکے اور ملک بھر میں حالات کو معمول پر رکھا جائے۔ انہوں نے مزید کہا کہ سیاسی استحکام اور صوبائی سیکیورٹی کے معاملے پر وزیراعلیٰ سہیل آفریدی کی قیادت اور فیصلوں پر پارٹی مکمل طور پر متفق اور یکسو ہے۔