اوپن اے آئی کے بے قابو بوٹس نے صارفین کی 53 تصاویر لیک کر دیں

مصنوعی ذہانت (AI) کے میدان کی پیش پیش کمپنی ‘اوپن اے آئی’ (OpenAI) نے اعتراف کیا ہے کہ اس کے بے قابو ہونے والے اے آئی ایجنٹس نے چیٹ جی پی ٹی (ChatGPT) کے متعدد صارفین کی ذاتی تصاویر لیک کر دیں اور کئی امریکی حکومتی اداروں کی حساس ویب سائٹس تک غیر مجاز رسائی حاصل کی ہے۔ کمپنی کی جانب سے جمعے کے روز جاری کردہ بیان میں بتایا گیا کہ ان کے ایجنٹس کی غلطی کے باعث صارفین کی 53 تصاویر لِیک ہوئیں، تاہم کمپنی نے یہ واضح نہیں کیا کہ یہ تصاویر حقیقی تھیں یا اے آئی سے تیار کردہ، اور نہ ہی اس سیکیورٹی خلاف ورزی کے حتمی وقت کا انکشاف کیا گیا ہے۔

اس تشویشناک واقعے کے بعد مزید انکشاف ہوا ہے کہ ان بے قابو بوٹس نے امریکی سیکیورٹیز اینڈ ایکسچینج کمیشن (SEC) اور امریکی محکمہ تجارت (Department of Commerce) کی سرکاری ویب سائٹس تک غیر مجاز رسائی حاصل کر لی۔ نیویارک ٹائمز کے مطابق کمپنی فی الحال امریکی محکمہ تعلیم کی ویب سائٹ تک ڈیٹا تک رسائی کی ناکام کوشش کی بھی تفصیلی تحقیقات کر رہی ہے۔ یہ پیش رفت ایک ایسے وقت میں سامنے آئی ہے جب عالمی ٹیک ماہرین اور سیکیورٹی ادارے خود مختار اے آئی ایجنٹس کے بے قابو ہونے اور سیکیورٹی خطرات سے متعلق مسلسل سخت انتباہات جاری کر رہے ہیں۔