امریکی قونصلیٹ کراچی میں ’’فریڈم 250‘‘ تقریب، امریکی کامیابیوں کا جشن

امریکی قونصلیٹ جنرل کراچی نے امریکی آزادی اور کامیابیوں کے 250 سال مکمل ہونے کے موقع پر اور پاکستان کے ساتھ دیرینہ تعلقات کو اجاگر کرنے کے لیے ’’فریڈم 250‘‘ کے عنوان سے ایک شاندار استقبالیہ کا اہتمام کیا۔ اس تقریب کی تھیم ’’دی امریکن برانڈ‘‘ تھی، جس کا مقصد امریکی جدت، کاروباری صلاحیت اور 4 جولائی 1776 کے بنیادی اصولوں کو خراجِ تحسین پیش کرنا تھا۔ تقریب میں اسپیکر سندھ اسمبلی سید اویس قادر شاہ نے بطور مہمانِ خصوصی جبکہ گورنر سندھ سید نہال ہاشمی نے بطور اعزازی مہمان شرکت کی۔

تقریب سے خطاب کرتے ہوئے امریکی قونصل جنرل چارلس گڈمن نے کہا کہ ایک مستحکم معیشت ہی پائیدار ترقی کی ضامن ہے اور قونصل خانہ سندھ و بلوچستان میں تجارتی صلاحیتوں کو فروغ دینے کے لیے پرعزم ہے۔ انہوں نے بتایا کہ گزشتہ برس پاک امریکہ دوطرفہ تجارت 11 ارب ڈالر سے تجاوز کر گئی ہے۔ اس موقع پر ناظم الامور نیٹلی بیکر کے پیغام کا اعادہ بھی کیا گیا کہ ایک مضبوط پاکستان امریکہ کے اور مضبوط امریکہ پاکستان کے مفاد میں ہے۔ گورنر سندھ اور اسپیکر سندھ اسمبلی نے دونوں ممالک کے درمیان تعلیمی، معاشی اور ٹیکنالوجی کی سطح پر تعاون کو مزید مضبوط بنانے کی ضرورت پر زور دیا۔