چھوٹے دکانداروں کے لیے خصوصی ٹیکس سکیم ابتدائی مرحلے میں ہے: ایف بی آر

فیڈرل بورڈ آف ریونیو (ایف بی آر) نے وضاحت جاری کرتے ہوئے کہا ہے کہ چھوٹے دکانداروں کے لیے متعارف کرائی گئی خصوصی ٹیکس اسکیم اس وقت ابتدائی مرحلے میں ہے، اور اس کے تحت تاجر برادری کو رجسٹریشن کے عمل میں درپیش عملی و تکنیکی مشکلات کو دور کرنے کے لیے ترجیحی بنیادوں پر اقدامات کیے جا رہے ہیں۔ ایف بی آر حکام کے مطابق، حکومتِ پاکستان اور ٹیکس حکام تجارتی تنظیموں، مارکیٹ نمائندوں اور تاجر رہنماؤں کے ساتھ مسلسل رابطے میں ہیں تاکہ اس اسکیم کے طریقہ کار کو مزید آسان، شفاف اور سہولت پر مبنی بنایا جا سکے۔

ایف بی آر نے تاجر برادری پر زور دیا ہے کہ وہ رجسٹریشن کے دوران کسی بھی قسم کے تکنیکی مسئلے یا دشواری کی صورت میں براہِ راست ادارے سے رابطہ قائم کریں۔ حکام کا کہنا ہے کہ تاجروں کی جانب سے موصول ہونے والی تجاویز اور آراء کا جائزہ لیا جا رہا ہے تاکہ اسکیم میں ضروری اصلاحات کی جا سکیں۔ اس خصوصی ٹیکس اسکیم کا بنیادی مقصد چھوٹے دکانداروں کو آسان اور غیر پیچیدہ طریقہ کار کے ذریعے قومی ٹیکس نظام کا حصہ بننے کا موقع فراہم کرنا اور ان کے لیے کاروبار میں آسانی پیدا کرنا ہے۔ ایف بی آر نے امید ظاہر کی ہے کہ تاجر برادری کے تعاون سے یہ اسکیم اپنے مطلوبہ اہداف حاصل کر لے گی۔