امریکا اور ایران میں پیغامات کا تبادلہ، اتفاق رائے کی کوشش جاری ہے: قطر

قطری وزارت خارجہ کے ترجمان نے کہا ہے کہ امریکہ اور ایران کے درمیان تناؤ میں کمی اور مسائل کا حل نکالنے کے لیے سفارتی پیغامات کا تبادلہ مسلسل جاری ہے اور دونوں فریقین کے درمیان اتفاقِ رائے پیدا کرنے کی سنجیدہ کوششیں کی جا رہی ہیں۔ ترجمان کا کہنا تھا کہ اس وقت تمام متعلقہ فریقین کے پاس مسئلے کا پرامن اور سفارتی حل تلاش کرنے کے سوا کوئی دوسرا معقول راستہ نہیں ہے۔ اس کے ساتھ ہی قطر نے کسی بھی فریق کی جانب سے علاقائی بنیادی ڈھانچے (انفراسٹرکچر) کو نشانہ بنانے کے عمل کی سختی سے مخالفت کی ہے۔

قطری وزارت خارجہ کے ترجمان نے واضح کیا کہ خطے کی عسکری یا معاشی تنصیبات پر حملوں کی دھمکیاں بین الاقوامی قوانین اور اچھے پڑوس کے اصولوں کی صریح خلاف ورزی ہیں۔ انہوں نے زور دے کر کہا کہ خلیجی ممالک نے جاری تنازع کا حصہ بننے کا انتخاب ہرگز نہیں کیا، لہٰذا خطے کے امن کو داؤ پر نہیں لگایا جانا چاہیے۔ انہوں نے مزید کہا کہ ایران کو علاقائی ممالک کے خلاف جارحانہ رویہ ترک کرنا ہوگا۔ قطری حکام نے اعادہ کیا کہ تمام تر چیلنجز اور نامساعد حالات کے باوجود قطر خطے میں پائیدار امن اور استحکام کے لیے اپنی ثالثی کی کوششوں سے ہرگز دستبردار نہیں ہوگا۔