امریکا، ایران کی ڈیڈ لاک ختم کرنیکی کوششیں، جنگ کے خاتمے کیلئے مذاکرات پر غور

امریکہ اور ایران کے وفود نے جاری تنازع میں پیدا ہونے والے ڈیڈ لاک کو ختم کرنے اور جنگ کے ممکنہ خاتمے کے لیے ایک مرحلہ وار طریقہ کار (Phased Approach) پر غور شروع کر دیا ہے۔ عالمی خبر رساں ایجنسی ‘رائٹرز’ کی رپورٹ کے مطابق کئی ماہ سے جاری تناؤ اور جنگی صورتحال کے بعد دونوں ممالک ایک ایسے ممکنہ مرحلہ وار معاہدے کی گنجائش کا جائزہ لے رہے ہیں جس کے تحت ایران آبنائے ہرمز کو دوبارہ بحری نقل و حرکت کے لیے کھول دے گا، جبکہ بدلے میں امریکہ ایران پر عائد معاشی ناکہ بندی اور سخت اقتصادی پابندیاں ختم کرے گا۔ تاہم، اطلاعات کے مطابق ایران محصولات اور دیگر امور پر لچک دکھانے کے لیے تیار ہے لیکن آبنائے ہرمز کے معاملے پر اپنا موقف برقرار رکھے ہوئے ہے۔

ایک سینئر ایرانی عہدیدار نے اس پیش رفت پر تبصرہ کرتے ہوئے کہا کہ موجودہ سیاسی و عسکری تعطل کو ختم کرنے کا سب سے عملی اور قابلِ عمل حل مرحلہ وار معاہدہ ہی ہو سکتا ہے۔ دوسری جانب امریکہ کے سابق سینیئر سفارتکار اور مذاکرات کار ڈینس راس نے تجزیہ کرتے ہوئے کہا ہے کہ امریکہ میں آنے والے مڈ ٹرم انتخابات سے پہلے دونوں ملکوں کے درمیان کسی حتمی معاہدے پر اتفاق ہونے کے امکانات فی الوقت 30 فیصد تک ہیں۔