سیاست عبادت اور عوام کی خدمت ہے، زبان اور سوچ کو قید نہیں کیا جا سکتا: سلمان اکرم راجہ

راولپنڈی کے علاقے گورکھ پور ناکے پر میڈیا سے گفتگو کرتے ہوئے پاکستان تحریک انصاف کے رہنما سلمان اکرم راجہ نے کہا ہے کہ بانی پی ٹی آئی کا واضح حکم ہے کہ ان کے لیے کسی قسم کی آسائش نہ مانگی جائے بلکہ اصول اور عوامی حقوق کی بات کی جائے۔ انہوں نے کہا کہ ہماری بات ماننے کی کوئی وجہ نہیں کہ انکار کیا جائے، فیصلہ سازوں کو چاہیے کہ عوام کے حقوق عوام تک پہنچائیں تاکہ حالات اس نہج تک نہ پہنچیں۔

صحافی کے سوال پر کہ وزیراعلیٰ خیبرپختونخوا سہیل آفریدی نے ڈی چوک کفن پہن کر پہنچنے کا بیان دیا ہے، سلمان اکرم راجہ نے کہا کہ وزیراعلیٰ نے کوئی تاریخ نہیں دی بلکہ صرف عزم کا اظہار کیا ہے، ہم چاہتے ہیں کہ معاملات افہام و تفہیم سے حل ہوں۔

بانی پی ٹی آئی سے ملاقات کے حوالے سے ایک سوال کے جواب میں انہوں نے کہا کہ یہ کہا جا رہا ہے کہ ملاقات کی شرط ہے کہ کوئی سیاسی بات نہ کی جائے، لیکن سیاست کوئی گناہ نہیں۔ ایک شخص نے اپنی پوری زندگی سیاست اور عوام کی خدمت کے لیے وقف کر دی، ان کے نزدیک سیاست عبادت اور فلاحِ عامہ کا راستہ ہے۔

سلمان اکرم راجہ نے کہا کہ کسی انسان کے جسم کو قید کیا جا سکتا ہے لیکن اس کی زبان، سوچ اور ذہن کو قید نہیں کیا جا سکتا۔ تاریخ گواہ ہے کہ گاندھی اور نہرو جیسے رہنماؤں نے جیل میں رہتے ہوئے کتابیں لکھیں جو شائع بھی ہوئیں۔ زبان کو قید کرنا سراسر غیر انسانی رویہ ہے۔

انہوں نے کہا کہ اس ملک میں آواز کو ہمیشہ کے لیے دبایا نہیں جا سکتا اور نہ ہی کسی کو غلام بنا کر رکھا جا سکتا ہے، یہ ملک قبرستان نہیں بن سکتا۔ ملک میں ووٹ کی حرمت ہوگی تو ہی ملک آگے بڑھے گا۔ فیصلہ سازوں کو یہ نہیں دیکھنا چاہیے کہ کون کیا کہہ رہا ہے بلکہ آئین اور قانون کے مطابق فیصلے کرنے چاہئیں۔

بانی پی ٹی آئی کی بہنوں سے متعلق سوال پر سلمان اکرم راجہ نے کہا کہ وہی بات سامنے آتی ہے جو بانی کا پیغام ہوتا ہے، اس میں کوئی مسئلہ نہیں۔ سوشل میڈیا پر ہزاروں لاکھوں لوگ مختلف باتیں کرتے ہیں جن پر پارٹی کا کوئی اختیار نہیں، ہماری جدوجہد آئین، قانون اور آزادی کے لیے ہے